مرحوم ياشيخٍ على العز مبداه
شيخٍ عزيز ٍ عند ربعه والاصحاب
عز الضعيف وعز ربعه ومن جاه
واللي حداه الوقت لاجاه ماخاب
تركي ولد صمدان شيخٍ عرفناه
يِقدم على الطالات جازم ولا هاب
منصى رجال العز ياحي منصاه
لامِـن لفـوه بـلازمٍ فالهــم طاب
شيّـد بيـوت العـز يـازين مـبناه
بيت الكرم والطيب ماصك له باب
وحـق الرفـاقه عـارفه ماتناسـاه
ولايستمع في هرج حاقد وكذّاب
ياقِلّ وصفه بين ربعـه وحليــاه
ولاضنتي بلقى وصيفه بالاجناب
يالله ياللي كــل عبدٍ ترجّـاه
يالواحد المعبود يارب الأربــاب
ياعالمٍ باسرار صدري ومخفاه
اشفع لأبو مخلد ويسر له حساب
واجبر عزانـا في فقيدٍ فقدناه
والموت حق ولا لنا منه مجناب
وصلاة ربي عد وبلٍ نثر مــاه
على نبيٍ بيّن الحـق بكتــاب
