كتبها الشاعر/عبدالكريم فرحان الرحيمي
ماانته على عادتك ياعصر الأثنين
جـوّك حزن ودمـوع الاعـيان غيمه
ماتـشرح الخاطر ولاتطرِب العين
وللحزن في يومك وليلك وسيمه
اخذت راع الطيب فالعسر واللين
واقفيـت بأفراح اللـيال القديمـه
مدري تحسب ان الفرح عندنا دين
والا تـبا قــِرب الـيمين الكريمـه
والا تبا في عام سبع وثلاثين
يسجَل لسهم المنايا غنيمه
والا المنايا ماتحـب الرديين
تختار في روس الرجال العظيمه
اخذت من روس الرجال المسمين
شيخ له شداد ومهابه وقيمه
فقيدنا نأخذ بعد فقده سنين
وجروحنا وسط الضماير مقيمه
والدار لو تنبت ورود وبساتين
من بعد ابو خالد دهور ووخيمه
يبكونه الاقصين قبل الموالين
ويبكيه من بانت عليه الهزيمه
مرحوم يا شيخٍ يعدل الموازين
شيخٍ وصوفه في زمنا عديمه
الطيب يأخذ من صفاته دواوين
وتشرح معانيه العقول الفهميه
لامن هرج حكمه وعدل وبراهين
وصمته عن الزله وقار وحشيمه
عسى شفيعه مَن بنا منهج الدين
وفي جنة الفردوس يلقى نعيمه
ليست هناك تعليقات:
إرسال تعليق